He Pānui ki ngā whānau KKM Te Aho Matua

 

3 Haratua 2020

 

E ngā whānau Kura Kaupapa Māori Aho Matua, tēnā koutou katoa.

Tiwha tiwha te pō, tiwha tiwha te ao. Nō te wehenga o ngā mātua tūpuna, i a Ranginui rāua ko Papatūānuku te putanga mai o Te Aho Matua. He mea rapu, kimi nā te Kāhui Atua. Ko te whai ao, ko te ao mārama te hua. Tīhei Mauriora!


He oranga ngākau he pikinga waiora


Ka nui te aroha ki ō tātou whānau KKM. Nei rā te mihi maioha ki ngā tamariki, ngā mātua, ngā tumuaki, ngā kaiako, ngā kaiāwhina, ngā kaiwhakapai whenua me ngā whare tae noa ki ngā kaitaraiwa pahi. Ahakoa he rerekē te āhua o te kura i tēnei wā, kei te kaha ō tātou whānau ki te mahi kia tū wanawana tonu ai tā tātou kaupapa. Kei te kaha ō tātou whānau me ō tatou kaiako ki te whakarite akoranga hei tautoko i ā tātou tamariki. Ka wani kē!

Ngā mihi manahau ki a Hurunga te Rangi rāua ko Ngāti Ruanui


Kātahi te rongo pai. Haere ake ai ngā karakia i te wiki nei mō Te KKM o Hurunga te Rangi rāua ko Ngāti Ruanui. I hurihia ēnei kura hei kura arongatahi i te wiki kua pahure ake nei.

Ka nui te mihi maioha ki te whānau o Te KKM o Hurunga te Rangi kōrua ko Te KKM o Ngāti Ruanui.


He Hui Humi (Zoom) ā-rohe i tēnei wiki
 

E whakatūria ana ngā hui ā-rohe mā te Humi ā te wiki e tū mai nei. He āwhina nui ēnei hui kia whai wāhi ai ngā whānau ki te whakaputa whakaaro me te whakarongo ki ngā rautaki e whakahaeretia ana e tēnā kura, e tēnā kura. Ka whakapā atu ngā kaimahi ā-rohe o TRN ki te whakarite i tētahi wā humi. E whai ake nei ngā kaupapa ka kōrerotia ki te hui ā-rohe.

  1. Nō te taenga mai o te Urutā Korona-19, he aha ngā akoranga hou kua ūtaina ki runga i ngā kaimahi me tō whānau?
  2. Kei te pēhea te ako a ngā tamariki? Kei te noho ki te kāinga rānei, ki te kura rānei?
  3. He aha ngā āwhina kei te hiahiatia e tō kura kia pai ake ai te tautoko i ngā tamariki me nga whānau?

Te Tāpaetanga a TRN mō te Pire Mātauranga hou
 

Kua tukuna tā tātou tāpaetanga ki te komiti whiriwhiri Mātauranga ki te Whare Paremata mō te ara motuhake e hiahiatia ana e tātou. I tēnei wiki hoki, i noho tahi māua ko Whaea Cathy Dewes ki mua i te komiti whiriwhiri. E tāpiritia ana ngā hononga ipurangi ki te tuhinga tāpaetanga me te kiriata – 12:44 mēneti te roa - o tā māua ko Cathy kōrero. Mēnā he kōrero āu, tēnā whakapā atu ki tō Māngai rānei, ki te kaimahi TRN rānei e tiaki ana i tō rohe.

Ngā hononga Ipurangi

Te kiriata a Dr Cathy Dewes rāua ko Hohepa Campbell 12:44m

Te Tāpaetanga kōrero

Te kōrero whaituhituhi mai i te kiriata me ngā māharahara 32 e pā ana ki te Pire Mātauranga

.MP4 24.3 MB

.PDF 212 KB

.PDF 223 KB

 


Ahakoa te aha, ki te hiahia āwhina tō kura, tēnā whakapā mai.

Hohepa Campbell

Sandy Walker

Te Hiku

hohepa@runanga.co.nz

sandy@runanga.co.nz

Mahanga Pihama

Tāmaki Makaurau

mahanga@runanga.co.nz

Anahera Bowen

Te Puku

anahera@runanga.co.nz

Renee Wright

Te Kāhui Mounga

renee@runanga.co.nz

Renee Wright

Te Waka

renee@runanga.co.nz

Sandy Walker

Te Tai Rāwhiti

sandy@runanga.co.nz

Brenda Soutar

Te Upoko o te Ika

brenda@runanga.co.nz


Aroha nui, nā


Hohepa Campbell

Kaitakawaenga
hohepa@runanga.co.nz

 

TAM tohu-50

 He Pānui ki ngā whānau KKM Te Aho Matua
 

21 Paengawhāwhā 2020


E ngā whānau Kura Kaupapa Māori Aho Matua, tēna koutou katoa.


Ko Rangi ki runga, ko Papa ki raro, nei rā te mihi manahou ki a rāua tae noa ki a rāua tamariki. Ka huri ki a rātou ki ngā mate kua hinga atu rā, haere atu rā. Āpiti hono tātai hono, ko rātou ki a rātou. Āpiti hono tātai hono ko tātou e te hunga ora, tēna tātou katoa.

Pae Arai Taumata Toru

Kei ia whānau tōna ake tino rangatiratanga

Inanahi i whakaputaina e te Pirimia ngā aratohu mō ngā tamariki ki te hoki atu ki te kura. Kei te māharahara nui ngā whānau katoa o te motu.

Hei tautoko i ngā kura e whakarite ana ngā kaimahi o TRN me ngā Māngai i tētahi hui ā-waea i ngā rā tata e tū mai nei kia whai wāhi ai ngā KKM o ia rohe ki te whakawhitiwhiti whakaaro. Ka whakapā te kaimahi o tō rohe ki a koe me te whakamōhio atu i te wā o tō hui ā-rohe mā humi (zoom).

Ka rerekē te mahere ahunga whakamua mō ia whānau KKM, nā reira kua whakatakotoria ētahi mātāpono hei āwhina i tō whānau.

Kei ia whānau tōna ake tino rangatiratanga
Ko te oranga me te haumarutanga o te whānau katoa he take nui i tēnei wā
Tiakina te hunga whakaraerae o tō whānau


Ahakoa te aha, ki te hiahia āwhina tō kura, tēna whakapā mai.

Hohepa Campbell

Te Hiku

hohepa@runanga.co.nz

Mahanga Pihama

Tāmaki Makaurau

mahanga@runanga.co.nz

Anahera Bowen

Te Puku

anahera@runanga.co.nz

Renee Wright

Te Kāhui Mounga

renee@runanga.co.nz

Renee Wright

Te Waka

renee@runanga.co.nz

Sandy Walker

Te Tai Rāwhiti

sandy@runanga.co.nz

Brenda Soutar

Te Ūpoko o te Ika

brenda@runanga.co.nz


Aroha nui, nā

Hohepa Campbell
Kaitakawaenga/ Chief 
Executive
kaitakawaenga@runanga.co.nz


  

TAM tohu-50

 He Pānui ki ngā whānau KKM Te Aho Matua
 

7 o Paenga-whāwhā, 2020
 

E ngā Tumuaki KKM Aho Matua, tēnā koutou katoa.

Tangihia te hunga wairua kua huri ki tua o te ārai, kua tangata Hawaikitia. Haere koutou, e moe i te moenga roa. Kauria ngā moana ki te wā kāinga o ō tātou mātua tūpuna, ki tawhiti nui. Āpiti hono, tātai hono, ko koutou ki a koutou. Āpiti hono tātai hono, tātou te hunga, tēnā tātou katoa. E āku rangatira, tēnei te mihi maioha ki a koutou katoa.

Hui Humi (ZOOM meeting) mā ngā Tumuaki KKM TAM

Kia puawai tōna waiora me tōna hauora i roto i
te hono tāngaengae o tōna wairua me tōna tinana

 He mea pārekareka te rongo i ngā kōrero mō te mahi nui e hāpaitia ana e tēnā kura, e tēnā kura. He maha hoki ngā rautaki hīkaka e haere ake ana i tēnei wā o te noho herehere ki te kāinga. Heoi anō, i ngā rangi kua taha ake nei, kua tono ētahi Tumuaki i te āwhina a TRN ki te whakahaere i ngā akoranga matihiko mō ā rātou tamariki wharekura. Ā te Taite nei, te 9 o ngā rā o Paenga-whāwhā, ā te 2 karaka ki te 3 karaka i te ahiahi ka tū tētahi hui Tūmuaki mō ērā o ngā kura kei te hiahia āwhina.

Kei te hiahia āwhina tō kura?

Ka taea e tō kura te āwhina ētahi atu kura e rapu āwhina ana?

He kōrero tautoko āu hei āwhina i ētahi atu whānau?

Ki te wātea koe ki te tūhono, panaia te hono e whai ake nei ā te wā o te hui. Ka 1 hāora noa iho te roa o te hui. Ki te hiahia anō tātou ki te whakahaere i tētahi atu hui humi, ā-rohe rānei, ā-kāhui rānei, ka taea e te kaimahi o tō rohe te whakarite. Ki te wareware koe i te hono ipurangi, haere ki te whārangi ipurangi a TRN www.runanga.co.nz , kei reira te hono hui humi e whai ake nei.

 

He take anō tāu hei matapaki? Tēna tukua te ngako o tāu kōrero ki a Whaea Trish, tari@runanga.co.nz Māna tētahi kōrero whakaraupapa e whakarite mā tā tātou hui.

Kia tau te ihirangaranga aroha o Rongo huri noa i tō kāinga mirurmiru me tō whānau.

Aroha nui, nā

Hohepa Campbell
Kaitakawaenga/ Chief 
Executive
kaitakawaenga@runanga.co.nz


  

TAM tohu-50

He Pānui ki ngā whānau KKM Te Aho Matua


31 o Poutū-te-rangi, 2020

 

E ngā whānau Kura Kaupapa Māori Aho Matua, tēnā koutou katoa.
 

Tēnā hoki koutou i roto i ngā āhuatanga o te wā. E tangi nei ki a rātou mā kua mene atu ki te pō. Haere atu rā koutou. Āpiti hono tātai hono, ko rātou ki a rātou. Āpiti hono tātai hono, ko tātou e te hunga ora ki a tātou, tēnā tātou katoa.

 

Tā Tātou Mahi Tahi

Nā te tū āhua o te Urutā Huaketo Karauna-19 (Covid 19), he nui ngā māharahara kua kōrerotia e tēna me tēna. Hei āwhina i ngā whānau, kua whakatauria ngā kaimahi ki te tiaki i ngā rohe TRN kia pai ai tā tātou mahi tahi.

 

E whai ake nei ko ngā nama whakapā o ngā kaimahi TRN. Mēnā kei te hiahia āwhina tō whānau, tēnā whakapā mai. E tīmata ana TRN ki te whakarite i ā tātou anō ki te mahi tahi.

 

Hohepa Campbell

Te Hiku

hohepa@runanga.co.nz

Mahanga Pihama

Tāmaki Makaurau

mahanga@runanga.co.nz

Anahera Bowen

Te Puku

anahera@runanga.co.nz

Renee Wright

Te Kāhui Mounga

renee@runanga.co.nz

Renee Wright

Te Waka

renee@runanga.co.nz

Sandy Walker

Te Tai Rāwhiti

sandy@runanga.co.nz

Brenda Soutar

Te Upoko o te Ika

brenda@runanga.co.nz

 

He pātai āu?
Mehemea he pātai rānei, he āwangawanga rānei āu, tēnā whakapā mai; tari@runanga.co.nz

Aroha nui, nā

Hohepa Campbell
Kaitakawaenga/ Chief Executive
kaitakawaenga@runanga.co.nz

TAM tohu-50